Hil da Gabriel Aresti, 
borrokari ta amesti.
Beste mundura ihes egin du 
bere mailu eta guzti.

Eskuan mailu berria 
landu nahiaz Harria, 
Kantauriako itxas ertzean 
gure asabek jarria.

Trumoi eta hodei beltzak. 
Nun dira jolas ta dantzak? 
Zizel ta mailuz landu beharra 
Harri zaharraren ertzak.

Egun sentian zotinak 
zurrunbiloan sorginak. 
Goizean goizik mailu hotsa 
du Aresti gure harginak.

Hargintzan ofizioa
harrizko afizioa,
Harri landutan egin nahirik 
Euskaldun Palazioa.

Gaur lehertu da lanean, 
Herriaren barrenean, 
Euskal Harria borobiltzeko 
enpeinu ta afanean.

Hil da Gabriel Aresti, 
borrokari ta amesti,
bere lurrean bizi ezinik, 
mingots, garratz eta ezti. 

Abel Muniategi

«Hil da», Agiriak: Euskal poetak eta artistak G. Aresti-ren omenez, Gipuzkoako Aurrezki Kutxa Probintziala, 1978

Dionisio Blanco margolariak 1975eko abenduan egindako Gabriel Arestiren marrazkia