Izugarri atzeratzen dituk baforak errioaren sarreran
                                        berandu arribatuko dituk
portura burdin herdoildu eta kristal 
                                        lausotuak deskargatzera.
Artean Zorrozako eskolan hire poemak klasean (klasikoak
edo, klasekoak behintzat) irakasten dizkitek.
Modaz pasaturiko eskritorea haizela esaten dik lehenagoko
                                        iraultzaile irakasle bihurtuak,
hire kemen antzua laudatzen dik, tituloz eta zitaz karga
                                                                              karga eginda,
gomazko zapatakin harbelpean paseatuz, zapaltzen duen guzia
                                                                              gomazkoa bailitzen.
Ume aspertuak eskola-leihotik errioruntz soegiten dik
eta errio bazterreko fabriketatik mendiruntz.
Eta han mendian larre magalean umeak harri bat
                                                      erreparatu dik, eserleku bat.
Harrira inguratuko duk eta. letrak irakurriz, harginen
                                        berba sekretua dezifratzen saiatuko duk.
Harria? Poesia? Esanahiez kargaturiko mututasuna?
                                                Poeta Hilen Errepublikaren
fundazio akta? Haur aspertuaren ikasgelaz lekoreko
                                                                                bestetaratzea?

Oraindik, Gabriel, indartsuena duk legea eta
                    altza ezineko lausa ezarri ditek hire hilobi gainean.
Oraindik, hire hilarrian, ibiltariek estropozu egiten ditek,
                                        ume bat baino ez duk jakin minez inguratu.

Eta aurrerantzean ere heu bezalakoak izanen gaituk
                                                                                euskal poetak,
halako ekibokazio bat, behin behineko hezurraragia,
harria, harea, aidea,
ezer sostengatzen ez duen arbola adarra.

Joseba Sarrionandia

«Gabriel Aresti», Hnuy illa nyha majah yahoo, Elkar, 1995

Zamaontziak lanean Bilboko itsasadarrean aspaldiko argazkian. Bilboko Portu Autonomoaren Artxibo Historikoa